這陣，真濟朋友迷電視劇；毋過，阿芬講伊較愛看「真人實事」的節目。可比一個人去深山林內家己生產作物、家己掠魚；可比共一間狹閣古的厝改甲真現代閣開闊。抑是，一個人uì（從）百外公斤用各種方法減肥減到賰幾十公斤；生做真普通的少女予人自頭到跤打扮甲變做誠時行的新娘；甚至看一個若籃球遐大的瘤自一個人的腹肚提出來，也真好，「感覺家己也輕鬆起來。」
人的興趣本來就百百種。不過，看電影看劇，敢毋是較心適？
阿芬講看電視劇，會那看那想，「這是假的。」
這款心理，欲按怎看戲？親像台灣俗語講的，「做戲悾（瘋），看戲戇」；做戲的認真變鬼變怪，看戲的就愛共伊當做真的，才會當綴（tuè，跟）咧哭，啜咧笑啊。
另外一個朋友較好一屑仔，伊講看著無合理的劇情的時，會共家己講，「這是戲，這是看戲，免計較：做戇人戇戇仔看！」
「這是假的」是我做囝仔的時，不時會去講的，眠夢著恐怖的代誌，半醒半精神的時，就是按呢安慰家己，「這是假的，這是假的。」
幾年前看一齣電影《美麗境界》，拍的是數學天才John Forbes Nash的故事。伊帶精神分裂病症，會看著根本無存在的人；後來慢慢仔好起來，伊共家己講，「in（他們）是假的，in是假的，是我烏白想的。」
最近看一齣劇《無關係，是愛情啊》，也是討論精神分裂症。男主角做囝仔的時受著暴力對待，成年以後就不時看著一個予人拍甲全全傷的少年；為著欲救彼個實際上無存在的人，伊不時家己著傷。藥物治療以外，醫生也教伊愛用意志相信「伊是虛幻的，伊是假的」。
看電視劇毋是作恐怖的夢，毋是精神有問題，實在無必要共家己講「這是假的」。
我無遐爾（hiah-nī，那麼）理智，看劇的時，攏會予故事、予演員的表情牽咧行。
可能我自細漢就較呆，初初看電影的時，感覺奇怪，「哪會遐爾拄好，發生遮的代誌的時，有人佇邊仔翕（hip，拍）落來？」
"假的" - Google 新聞
October 22, 2020 at 11:18PM
https://ift.tt/3olAh5m
【台語極短篇】劉靜娟／這是假的 - udn.com
"假的" - Google 新聞
https://ift.tt/2TdWODD
Shoes Man Tutorial
Pos News Update
Meme Update
Korean Entertainment News
Japan News Update
Bagikan Berita Ini
0 Response to "【台語極短篇】劉靜娟／這是假的 - udn.com"
Post a Comment